Dili, 28 Jullu 2026 -  Ministériu Komérsiu no Indústria (MCI), liu husi Diresaun-Jerál Komérsiu, hala’o kooperasaun servisu ho Banco Central de Timor-Leste (BCTL), TIC Timor I.P., TELEKOMSEL, Banco Nacional de Comércio de Timor-Leste (BNCTL), Ministériu da Justiça no parseiru dezenvolvimentu sira hanesan International Trade Centre (ITC) no ASEAN -UK Economic Integration Programme (AEIP) Open Trade Pillar, organiza formasaun kona-ba Komérsiu Eletróniku ba funsionáriu Diresaun-Jerál Komérsiu durante loron tolu, iha MCI, Fomentu Mandarin Dili.

Formasaun ne’e fó oportunidade ba funsionáriu sira atu hasae koñsimentu jeral no kapasidade pratiku kona-ba asesu komérsiu eletróniku. Objetivu hosi formasaun ne’e maka atu prepara no habilita funsionáriu sira hodi responde ba dezenvolvimentu dijitál, ne’ebé fó fasilitasaun ba transasaun komérsiu no aumenta transparénsia iha setór ekonomia.

Inisiativa ne’e mos parte husi esforsu governu atu promove modernizasaun administrativu no digitalizasaun servisu komérsiu, liuliu iha tempu ne’ebé integrasaun Timor-Leste iha kuadru rejionál ASEAN no Organizasaun Mundiál Komérsiu ne’ebe sei fó desafiu bo’ot.

Formasaun loron tolu ne’e fó espasu ba partilla esperiénsia entre institusaun governu no parseiru privadu, atu garante funsionáriu sira bele adapta ho mudansa teknolójika no implementa komérsiu eletróniku ho efikasia.