𝐃𝐢́𝐥𝐢, 𝟐𝟖 𝐉𝐮𝐥𝐥𝐮 𝟐𝟎𝟐𝟔 - Vise-Ministru Komérsiu no Indústria, Sua Excelénsia Augusto Júnior Trindade, partisipa iha entrevista iha programa "Página do Governo", hodi esplika prioridade Governu nian ba dezenvolvimentu setór komérsiu no indústria, inklui medida sira atu hametin merkadu, apoia setór privadu no promove kresimentu ekonomia sustentável iha Timor-Leste.

Durante entrevista, Sua Excelénsia hateten katak prioridade prinsipál Governu nian ba setór komérsiu mak asegura disponibilidade sasán esensiál, hametin sistema merkadu, promove kompetisaun ne'ebé justu, apoia produsaun lokál no kria ambiente negósiu ne'ebé favorável ba investimentu no dezenvolvimentu ekonomia.

Sua Excelénsia mós subliña importánsia transformasaun dijitál liuhosi habelar servisu públiku online, inklui lisensiamentu negósiu dijitál, hadi'a sistema informasaun merkadu no dezenvolve plataforma sira ne'ebé fasilita asesu ba informasaun ba emprezáriu no investidór sira.

Iha remata entrevista, Sua Excelénsia enkoraja emprezáriu no operadór negósiu sira atu kontinua investe, halo inovasaun no kumpre regulamentu nasionál. Sua Excelénsia reafirma Governu nia kompromisu atu servisu hamutuk ho setór privadu hodi harii ekonomia ida ne'ebé forte, kompetitivu no inkluzivu, ne'ebé bele kria oportunidade empregu no promove dezenvolvimentu industrial sustentável.

Programa "Página do Governo" lidera hosi Ministru Prezidénsia Konsellu Ministrus, Sr. Agio Pereira, no produz iha parseria ho RTTL no mídia nasionál sira, ho objetivu atu reforsa transparénsia governativa, prestasaun kontas no fasilita asesu públiku ba informasaun kona-ba polítika no desizaun Governu nian.

Epizódiu ida-ne'e sei transmite iha RTTL no mós iha plataforma ofisiál mídia sosiál Governu nian iha tempu badak.