Vise-Ministru Augusto Junior Trindade Partisipa Sorumutu Espesiál Ministru Ekonomia ASEAN

Dili, 10 Abril 2025

Vise-Ministru Komérsiu no Indústria señor Augusto Junior Trindade reprezenta Ministru Komérsiu no Indústria partisipa virtualmente sorumutu espesiál Ministru Ekonomia ASEAN iha loron 10 Abril 2025.

Sorumutu virtuál ida-ne’e diskute kona-ba efeitu polítiku hosi Estadus Unidus Amerika nian ne’ebé hasai hosi Prezidente Donald Trump iha loron 2 Abríl 2025, kona-ba aplikasaun tarifa iha merkadu Amerika.

Liuhosi komunikasaun virtual, Vise-Ministru Augusto Junior Trindade hato’o mós Timor-Leste nia prespetiva ba polítika komersiál Estadus Unidus Amerika nian ba ASEAN.

Timor-Leste haree katak ASEAN presiza iha esforsu liutan atu fortifika ekonomia iha rejiaun ne’e, prioritiza dezenvolvimentu ekonómiku rejionál no hasa’e liutan relasaun no dialogu ho Estadus Unidus Amerika.

Entretantu reuniaun ida-ne’e atu konsolida pensamentu no foti desizaun mutua hasoru polítika komersiál Estadu Unidus Amerika nian. Tanba membru ASEAN sira iha momentu ida-ne’e buka solusaun atu fó resposta ba polítika komersiál refere.

Iha reuniaun ida-ne’e, membru ida-idak iha oportunidade atu hato’o sira-nia hanoin kona-ba asuntu refere.