𝐌𝐂𝐈 𝐡𝐚𝐥𝐚’𝐨 𝐒𝐞𝐦𝐢𝐧𝐚́𝐫𝐢𝐮 𝐍𝐚𝐬𝐢𝐨𝐧𝐚́𝐥 𝐤𝐨𝐧𝐚-𝐛𝐚 𝐃𝐞𝐤𝐫𝐞𝐭𝐮-𝐋𝐞𝐢 𝐧𝐨 𝐃𝐢𝐩𝐥𝐨𝐦𝐚 𝐌𝐢𝐧𝐢𝐬𝐭𝐞𝐫𝐢𝐚́𝐥 𝐛𝐚 𝐗𝐞𝐟𝐞 𝐊𝐚𝐫𝐠𝐮 𝐬𝐢𝐫𝐚
Dili, 7 Abril 2025
Sua Exelénsia, Vise-Ministru Komérsiu no Indústria, Sr. Augusto Júnior Trindade, prezide serimónia abertura Semináriu Nasionál kona-ba Divulgasaun Dekretu Lei Nú.27/2023, 14 Setembru no Diploma Ministeriál Nú. 23/2024, 20 Marsu, ne’ebé organiza hosi Gabinete Jurídiku Ministériu Komérsiu no Indústria (MCI), ne’ebé hala’o iha Salaun Fomentu Mandarin, iha Dili.
Objetivu husi inisiativa ne’e mak atu fornese informasaun detallu ba Diresaun no Departamentu sira, husi sentrál to’o munisípiu, hodi garante koñesimentu no implementasaun efetiva ba padraun kompeténsia ne’ebé estabelese ona iha lejizlasaun ne’ebé temi ona, ne’ebé regula organizasaun no estrutura MCI nian.
Bainhira loke semináriu ne’e, vise-ministru destaka katak divulgasaun dokumentu legál sira hakarak atu fasilita no regula jestór sira-nia dezempeñu, hodi permite sira atu asume responsabilidade sira ne’ebé inerente ba sira-nia funsaun ho klareza liután.
“Divulgasaun ida ne’e permite koordenasaun servisu ne’ebé di’ak liu no hametin papél lideransa iha estrutura Ministériu nia laran,” dehan VMCI.
Koordenadór Gabinete Jurídiku, Sr. Gregório da Silva, reforsa katak diseminasaun Lei Orgánika no regulamentu MCI ne’e esensiál atu nune’e sira ne’ebé responsavel ba jestaun kompriende ho klaru sira-nia kompeténsia, hodi garante jestaun ne’ebé efisiente liután.
“Lei Orgánika MCI konstitui baze legál ba funsionamentu administrasaun no jestaun burokrátika Ministériu nian,” nia realsa.
Iha seminariu ne’e hetan partisipasaun husi Diretor Jeral, Diretor Nasional sira, Xefe Departamentu, Diretor Munisipiu no RAEOA, nomos Xefe Gabinete sira, Asesor no Tekniku Apoiu Profesional sira.
