Jenebra, Suisa, 7 Jullu 2026 – Delegasaun Repúblika Demokrátika Timor-Leste, lidera husi Ministru Komérsiu no Indústria, Sua Exelénsia Sr. Nino Pereira, no akompaña husi Embaixadór no Reprezentante Permanente Repúblika Demokrátika Timor-Leste nian iha Jenebra Sua Exelénsia Sr. António da Conceição, partisipa Reuniaun Asembleia Estadu-membru Organizasaun Mundiál ba Propriedade Intelektuál (OMPI) ba dala neen-nulu-resin-ualu. Asembleia ida nee halibur Estadu-membru sira hodi diskute asuntu fundamentál sira relasiona ho propriedade intelektuál, adota desizaun sira kona-ba programa serbisu no orsamentu Organizasaun nian, no hametin kooperasaun internasionál hodi promove inovasaun, kriatividade, no dezenvolvimentu sustentável.

Iha nia diskursu, Ministru Nino Pereira reafirma kompromisu Governu nian hodi dezenvolve sistema nasionál propriedade intelektuál no hato’o nia apresiasaun ba apoiu ne’ebé fó hosi OMPI. Nia deklara mós katak, hafoin adezaun Timor-Leste nian ba Organizasaun Mundiál Komérsiu (OMK) no integrasaun iha Asosiasaun Nasaun Sudeste Aziátiku (ASEAN), propriedade intelektuál sai ona hanesan pilar fundamentál ba dezenvolvimentu nasionál.

Ministru mós informa ba Estadu-membru sira katak Kódigu Propriedade Industriál Timor-Leste nian iha hela faze finál aprovasaun nian iha Parlamentu Nasionál, Kódigu refere konstitui baze legál ba kriasaun Eskritóriu Nasionál Propriedade Intelektuál dahuluk iha Timor-Leste.

Iha marjen Asembleia Jeral OMPI nian, delegasaun Timor-Leste sei hala’o enkontru bilaterál sira ho OMPI, Estadu-membru sira no institutu parseiru propriedade intelektuál nian, ho objetivu atu hametin kooperasaun no mobiliza asisténsia téknika ba implementasaun Kódigu Propriedade Industriál, estabelesimentu Eskritóriu Nasionál Propriedade Intelektuál no dezenvolvimentu ekosistema nasional ba propriedade intelektuál.