Díli, 18 Juñu 2026 - Ministru Komérsiu no Indústria, S.E. Sr. Nino Pereira, ohin halo enkontru bilaterál ho Embaixadór Vietname iha Timor-Leste, S.E. Sr. Pham Bim Dam, atu hametin liután kooperasaun ekonómika no parseria institusionál entre nasaun rua.

Iha enkontru ne’e, parte rua reflete kona-ba vizita altu nivel Primeiru-Ministru Kay Rala Xanana Gusmão foin lalais ne’e ba Vietname, ne’ebé marka nu’udar misaun estranjeiru ida ne’ebé susesu liu hosi lideransa Timor-Leste nian. Embaixadór subliña katak programa loron haat nian permite delegasaun la'ós de'it atu envolve iha konversa ofisiál sira ho líder prinsipál sira Vietname nian maibé mós atu esperiénsia ambiente dinámiku no espíritu emprezariál nasaun nian - hodi estabelese fundasaun metin ba kolaborasaun iha futuru.

Embaixadór Pham Bim Dam fó parabéns ba Timor-Leste nia adezaun ba ASEAN no WTO, hodi nota katak adezaun sira-ne’e lori oportunidade no responsabilidade. Nia oferese perísia Vietname nian iha dezeña estratéjia sira hodi maximiza benefísiu sira hosi integrasaun internasionál, inklui fasilitasaun komérsiu, dezenvolvimentu industriál, no padronizasaun hosi kompromisu sira. Embaixadór propoin kooperasaun prátika liuhosi grupu traballu, troka esperiénsia, no inisiativa konjunta hodi hasa’e fluxu sasán no servisu entre nasaun rua ne’e.

Ministru Nino Pereira simu ho laran-haksolok apoiu ne’e no destaka Timor-Leste nia kompromisu, atu diversifika ekonomia, hametin partisipasaun setór privadu, no aprende husi Vietname nia transformasaun ba sentru manufatura rejionál. Nia subliña importánsia empreendedorizmu, reforma institusionál, no dezenvolvimentu sustentável nu’udar motor xave ba kresimentu iha Timor-Leste.

Parte rua konkorda atu prepara projetu no dokumentu konkretu sira antes reuniaun Komité Konjuntu Governu nian ne'ebé sei mai, hodi garante katak kompromisu sira tradús ba kooperasaun ne'ebé bele halo asaun. Diskusaun ne'e mós ko'alia kona-ba inisiativa sira governu-ba-governu (G2G) no negósiu-ba-emprezáriu (B2B), ho énfaze iha organizasaun eventu sira no envolve kámara komérsiu sira hodi promove oportunidade investimentu nian.

Enkontru ne’e reafirma sinseridade no amizade entre Timor-Leste no Vietname, ho parte rua ne’ebé espresa prontidaun atu koopera nu’udar parseiru hodi harii ekonomia ida ne’ebé diversifikadu, reziliente, no haree ba oin.