𝐃í𝐥𝐢, 𝟏𝟓 𝐝𝐞 𝐉𝐮ñ𝐮 𝟐𝟎𝟐𝟔 - Ministru Komérsiu no Industria, Nino Pereira, partisipa iha Diskusaun no Votasaun Jenerálidade ba Proposta lei númeru 18/VI (2a) Kona-ba Kódigu Propriedade Industriál, sala Plenária Parlamentu Nasional, segunda (15/06).

Nune’e Parlamentu Nasionál aprova iha faze Jenerálidade ba proposta lei refere ho votu 𝙖 𝙛𝙖𝙫𝙤𝙧 44, 𝙠𝙤𝙣𝙩𝙧𝙖 0 𝙣𝙤 𝙖𝙗𝙨𝙩𝙚𝙣s𝙖𝙪𝙣 16;

Lejislasaun ne’e, kompostu hosi artigu 203, atu moderniza enkuadramentu jurídiku nasionál, proteje patente sira, marka sira no inovasaun, aliña Timor-Leste ho padraun internasionál sira hosi OMK no ASEAN nian. Inisiativa ne’e, konsidera hanesan estratéjiku ba diversifikasaun ekonómika no valorizasaun koñesimentu tradisionál, maski organizasaun sira sosiedade sivil nian alerta kona-ba nesesidade transparénsia boot liu no partisipasaun populár iha prosesu lejislativu.

Importánsia Propriedade Intelektuál (PI) iha Komérsiu, Haburas Inovasaun ba propriedade intelektuál, liuliu propriedade industriál, enkoraja inovasaun hodi asegura katak kriadór no inventor sira bele hetan benefísiu ekonómiku hosi sira nia serbisu/obra no proposta Lei ida ne´e sai pasu signifikativu ida ba Timor-Leste nia enkuadramentu legál no institusionál ba Propriedade Intelektuál.

Projetu Kódigu Propriedade Industriál finaliza liuhosi kolaborasaun ho Organizasaun Mundiál Propriedade Intelektuál (OMPI/WIPO), ne'ebé fornese input hodi hadi'ak esbosu ne'e tuir padraun internasionál no interese nasionál, eskritóriu Patente Europeu (EPO) mós kontribui liuhosi fo input ba provizaun sira relevante ho patente nian nomos Prosesu kolaborativu ne'e subliña Timor-Leste nia kompromisu atu dezenvolve sistema PI ne’ebé efetivu no modernu.

Ho aprovasaun Kódigu Propriedade Industriál ida ne´e, Timor-Leste preparadu di’ak liu atu kumpri kompromisu sira OMK nian, no prepara ba adezaun sira iha futuru hanesan ba ASEAN no iEPA.

Antes ne’e Ministériu Komérsiu no Indústria (MCI), hamutuk ho ajensias estadu sira hanesan AIFAESA, SERVE, IQTL no Autoridade Aduaneira, hala’o audiénsia ho Komisaun D Parlamentu Nasional, ne’ebe MCI aprezenta ho intensaun katak, lei ne’e atu fó konfiansa ba operador ekonómiku sira, ho objetivu atu kria ambiente ida-ne’ebé kompetitivu no transparente no promove dezenvolvimentu ekonómiku ne’ebé sustentável, hadi’a nafatin kondisaun moris populasaun nian, no konsumidór sira-nia moris di’ak.

Sesaun plenária ne’e prezide hosi Prezidente Parlamentu Nasionál, Maria Fernanda Lay,  no partisipa hosi Ministru Komérsiu no Indústria, Nino Pereira,  akompaña husi asesór no ekipa tékniku sira, no mós Vise-Ministru Asuntus Parlamentares, Adérito Hugo da Costa.

 𝙈é𝙙𝙞𝙖 𝙈𝘾𝙄