Parlamentu Nasionál aprova ona, iha votasaun final global ba Proposta Lei No. 20/VI (3º) – Lei Promosaun Esportasaun, ho votu a favór 56 Kontra 0 no Abstensaun 0.

Esbosu lei ne'ebé aprova,  antes ne'e hetan ona aprovasaun hosi reuniaun Konsellu Ministru iha loron 12 fulan-Marsu tinan 2025, tuir proposta hosi Vise-Primeiru-Ministru, Francisco Kalbuadi Lay, iha nia kapasidade nu'udar Ministru Koordenadór ba Asuntu Ekonómiku sira.

Aprovasaun ba lei ida ne’e hanesan parte ida husi esforsu atu diversifika ekonomia nasional no hamenus dependensia ba reseitas husi Fundu Minarai. Lejislasaun ne’e estabelese enkuadramentu legál ida ho objetivu atu fasilita no enkoraja esportasaun sasán no servisu sira, liuhosi promove kompetitividade setór privadu nian no kria kondisaun sira ne’ebé favoravel liu ba komérsiu no investimentu estranjeiru.

Lejislasaun ne’e aliña ho Planu Estratéjiku Dezenvolvimentu Nasionál no kompromisu internasionál sira ne’ebé Timor-Leste hala’o, inklui iha kuadru Organizasaun Mundiál Komérsiu no prosesu integrasaun ASEAN nian.

Entre medida prinsipál sira ne'ebé prevee ona maka simplifikasaun hosi prosedimentu sira esportasaun nian, ho redusaun hosi rekizitu administrativu sira, kriasaun hosi insentivu fiskál no administrativu sira ba empreza esportadór sira, no rekoñesimentu formál hosi entidade sira ne'ebé sertifikadu. Lejislasaun ne’e inklui mós implementasaun fatin ida de’it hodi apoia prosesu esportasaun, asaun kapasitasaun ne’ebé dirije ba empreza ki’ik no média sira, no promosaun zona ekonómika sira ne’ebé foka ba merkadu esternu.

Plenária ne’e prezide husi Prezidente Parlamentu Nasionál, Maria Fernanda Lay. Iha sesaun ne’e hetan partisipasaun husi Ministru Komérsiu no Indústria, Nino Pereira, Vise-Ministru Asuntu Parlamentár, Adérito Hugo da Costa.