𝗠𝗞𝗜 𝗣𝗮𝗿𝘁𝗶𝘀𝗶𝗽𝗮 𝗶𝗵𝗮 𝗸𝗼𝗺𝗲𝗺𝗼𝗿𝗮𝘀𝗮𝘂𝗻 𝗮𝗻𝗶𝘃𝗲𝗿𝘀á𝗿𝗶𝘂 𝗣𝗼𝗹í𝘀𝗶𝗮 𝗡𝗮𝘀𝗶𝗼𝗻á𝗹 𝗧𝗶𝗺𝗼𝗿-𝗟𝗲𝘀𝘁𝗲 (𝗣𝗡𝗧𝗟) 𝗯𝗮 𝗱𝗮𝗹𝗮 𝟮𝟱.
Dili, 27 Marsu 2025
Ministru Komérsiu no Indústria (MCI), Sua Eselénsia, Nino Pereira, hamutuk ho membru Governu Konstitusionál IX, partisipa iha komemorasaun aniversáriu Polísia Nasionál Timor-Leste (PNTL) ba dala 25, ne'ebé hala'o iha Palásiu Governu, Dili.
Primeiru Ministru, Kay Rala Xanana Gusmão, iha diskursu, hato'o ninia orgullu hodi selebra loron aniversáriu PNTL ba dala 25, instituisaun fundamentál ba seguransa no estabilidade país nian. Xanana felisita membru PNTL hotu ba sira-nia profesionalizmu no dedikasaun ba povu Timor-Leste.
"PNTL mai husi abilidade no ohin loron sai pilar importante ba demokrasia no konsolidasaun estabilidade país nian. Maske hasoru dezafiu oioin no susar, PNTL hatudu ona susesu barak. Ohin, ita selebra susesu ne'e no PNTL halo promosaun diviza tranzitória ba membru hamutuk 2,764," hateten Primeiru Ministru.
PM husu ba membru PNTL atu kontinua hatudu integridade, disiplina, no dedikasaun ba povu Timor-Leste, no labele envolve iha arte marsiais no rituais. Xefi guvernu mós husu atu kontinua hasa'e motivasaun, orgullu, no humildade, hodi inspira timoroan hotu ba dezenvolvimentu sosiedade pasífika, tolerante, no próspera. "Viva PNTL!" nia hakilar.
Komandante Jerál PNTL, Henrique da Costa, hateten katak PNTL hahú ho polísia na'in 50 ne'ebé treina iha East Timor Police Service (ETPS), no ikus mai muda ba PNTL. Henrique hateten PNTL adapta evolusaun sosiedade no hametin populasaun nia konfiansa. "Ami promete dedika aan, serví ho kompromisu no motivasaun aas, nu'udar fonte ba solusaun problema," nia afirma.
Aniversáriu PNTL ba dala 25 ne'e partisipa husi Prokuradór Jerál Repúblika, Vise Prezidente Parlamentu Nasionál, Xefe Estadu Maior F-FDTL, Tenente Jerál Falur Rate Laek, korpu diplomátiku, reprezentante Polísia Repúblika Indonézia (Polri), Komandante Jerál Guarda Nasionál Repúblika (GNR) Portugál, Komandante Jerál Polísia Federál Austrália, membru Parlamentu Nasionál, komandante jerál sesante ho espoza no membru PNTL sira.
_Media MCI
