Dili, 31 Outobru 2024

Vise Prezidente Ezekutivu no Sekretáriu Jerál ba Asosiasaun Emprezáriu Xinés Joven Iha Timor-Leste (Association of Chinese Youth Entrepreneurs in Timor-Leste) ho nia ekipa hasoru malu ho Ministru Nino Pereira iha edifisiu Ministériu Komérsiu no Indústria ohin.

Iha reuniaun Ministru Nino Pereira husu Asosiasaun Emprezáriu Xinés Joven Iha Timor-Leste (Association of Chinese Youth Entrepreneurs in Timor-Leste) atu kolabora ho Governu Timor-Leste hodi kontrola komersiante xines sira iha Timor-Leste, atu organiza ho di'ak atividade faan iha loja sira ne'ebé komersiante xinés sira estabelese, mantein presu ne'ebé normal no la bele faan produtu ne'ebé liu ona prazu.

Ministru Nino Pereira preokupa tebtebes kondisaun loja sira ne'ebé la organizadu, faan sasan ne'ebé liu prazu no presu ne'ebé la asesível. Tanba bainhira Ministru Nino Pereira tuun rasik iha terenu hodi halo inspesaun ba loja sira iha Sidade Dili deteta atividade faan hosi komersiante xinés sira la organiza ho di'ak, faan produtu balun ne'ebé liu prazu no mós iha presu ne'ebé la normal.

Vise Prezidente Ezekutivu no Sekretáriu Jerál ba Asosiasaun Emprezáriu Xinés Joven Iha Timor-Leste Rudy Y. Kwan apresia Governu Timor-Leste tanba bolu mós asosiasaun ne'e atu halo papel iha kontrolu komersiante xinés sira iha Timor-Leste atu kontinua kumpri regulamentu sira mak aplika iha Timor-Leste relasiona ho atividade komersiu no mós protesaun konsumidór.

_Remata