Programa IX Governu Konstitusionál atribui papél relevante ba setór Komérsiu no Indústria iha dezenvolvimentu ekonómiku no sosiál país nian.
Aprovasaun ba estrutura orgánika foun Ministériu Komérsiu no Indústria nian (MCI), liuhosi Dekretu-Lei no 72/2023 loron 14 fulan-setembru nian, implika nesesidade atu konsagra, liuhosi Diploma Ministeriál ida, konjuntu ida hosi servisu indispensavel sira no unidade orgánika sira. ba dezempeñu knaar no kbiit Ministériu ida ne’e nian ne’ebé di’ak. Iha kontestu ida-ne’e mak artigu 30, hosi diploma legál ne’ebé temi ona, hateten katak estrutura funsionál ministériu nian hetan aprovasaun hosi Ministru, iha forma diploma ministeriál.
Konfigurasaun husi servisu oin-oin, ne’ebé inkorpora iha Diploma ida ne’e, konsagra proposta husi respetivu diretór sira, no inkorpora sujestaun no proposta sira ne’ebé aprezenta husi sira.
Estrutura ne’ebé oras ne’e hetan ona aprovasaun hakarak atu konstitui maneira ida ne’ebé ladún burokrátiku hodi organiza no funsiona servisu sira, nune’e kontribui ba resposta ida ne’ebé di’ak liu ba nesesidade sira ne’ebé setór ne’e ezije, internalmente, maibé mós iha nia relasaun ho mundu esteriór.
Tanba ne'e, hanoin katak MCI sei ekipadu ho mekanizmu funsionál orgániku sira ne'ebé esensiál ba nia funsionamentu, ho exesaun ba posibilidade, bainhira iha volume ka aumentu iha serbisu ne'ebé justifika, atu kria Seksaun sira, ne'ebé sei konstitui se no bainhira presiza, hodi konsidera disponibilidade orsamentál ba objetivu ida-ne’e no iha konsulta ho Komisaun Funsaun Públika, tuir lei ne’ebé estabelese ona.