𝐌𝐢𝐧𝐢𝐬𝐭𝐫𝐮 𝐌𝐂𝐈 𝐒𝐢𝐦𝐮 𝐕𝐢𝐳𝐢𝐭𝐚 𝐤𝐨𝐫𝐭𝐞𝐳𝐢𝐚 𝐡𝐮𝐬𝐢 𝐄𝐦𝐛𝐚𝐢𝐱𝐚𝐝ó𝐫 𝐊𝐚𝐧𝐚𝐝á

𝘿í𝙡𝙞, 02 𝘿𝙚𝙯𝙚𝙢𝙗𝙧𝙪 2025

Ministru Komérsiu no Indústria Sr. Nino Pereira simu vizita kortezia husi Embaixadór Kanadá nian iha Indonézia, Sr. Jess Dutton hodi esplora oportunidade ba ambiente investimentu no oportunidade ba kolaborasaun ekonómika entre Kanadá no Timor-Leste.

Durante enkontru, Embaixadór Dutton destaka perísia Kanadá nian iha setór balun inklui mina-rai, gás, no estrativu, no reafirma governu nia kompromisu atu apoio komérsiu. Nia nota mós katak Kanadá negosia hela Akordu Komérsiu Livre (FTA) ho ASEAN, ne'ebé sei inklui Timor-Leste hanesan membru foun, hodi loke tan oportunidade sira ba kooperasaun bilaterál.

Ministro Nino Pereira rekoñese relasaun ne’ebé kleur ona entre Kanadá no Timor-Leste, hodi hanoin fali Kanadá nia papél durante independénsia no ninia apoiu kontinua liuhosi programa dezenvolvimentu no investimentu setór privadu. Embaixadór Dutton espresa interese Kanadá nian atu hasa'e importasaun kafé timoroan, hodi elojia nia kualidade hanesan ida ne'ebé di'ak liu iha mundu, no buka hatene tan produtu seluk ne'ebe Timor-Leste bele esporta ba Canadá. Nia mós reafirma prontidaun Kanadá nian atu esplora área foun sira ba kooperasaun entre Nasaun rua.