Jenebra, Suisa, 7 Jullu 2026 – Iha marjen Asembleia Estadu-membru Organizasaun Mundiál ba Propriedade Intelektuál (OMPI) ba dala neen-nulu-resin-ualu, Ministru Komérsiu no Indústria, Sua Exelénsia Sr. Nino Pereira, akompañadu husi Embaixadór no Reprezentante Permanente Repúblika Demokrátika Timor-Leste iha Jenebra, Sua Exelénsia Sr. António da Conceição, nomós membru delegasaun sira seluk, hala’o enkontru bilaterál ida ho Diretór-Jerál OMPI, Sr. Daren Tang, hodi ko’alia kona-ba Timor-Leste nia prioridade sira iha área propriedade intelektuál no reforsu kooperasaun ba futuru.

Iha sorumutu, Diretór-Jerál Daren Tang, reafirma nafatin apoiu OMPI nian ba Timor-Leste no destaka katak propriedade intelektuál mak instrumentu estratéjiku ba dezenvolvimentu nasionál. Nia enkoraja Timor-Leste atu uza ho ativu liután mekanizmu protesaun ba propriedade intelektuál, partikularmente indikasaun jeográfika, hodi hasa’e valór akresentadu produtu nasionál sira, nune’e mós aproveita propriedade intelektuál hodi impulsiona dezenvolvimentu ekonomia azul nian. Nia mós enkoraja Timor-Leste atu kontinua aprende esperiénsia hosi eskritóriu propriedade intelektuál sira ne'ebé estabelese ona, liuliu husi Estadu-membru ASEAN, no atu partisipa ativamente iha programa WIPO Academy nian, inklui oportunidade sira ba bolsu estudu, ho hodi haforsa kapasidade nasionál.

Iha resposta, Ministru Nino Pereira hato’o apresiasaun Governu nian ba parseria no asisténsia téknika ne’ebé la’o daudaun hosi OMPI, no reafirma tan katak aprovasaun Kódigu Propriedade Industriál Timor-Leste nian, iha tinan ida ne’e, sei loke dalan ba kriasaun Eskritóriu Nasionál Propriedade Intelektuál Timor-Leste. Ministru mos reafirma kompromisu Governu atu kontinua servisu hamutuk ho OMPI iha implementasaun enkuadramentu legál foun, hametin kapasidade institusionál no rekursu umanu, dijitaliza administrasaun propriedade intelektuál, no promove propriedade intelektuál nu’udar motór ba inovasaun, empreendedorizmu, no dezenvolvimentu ekonómiku sustentável.